ಸೆ.2ರಂದು ಸ್ತಬ್ಧವಾಗಲಿದೆ ಭಾರತ

Bharath-Bandh

ಕೇಂದ್ರ ಸರ್ಕಾರ ಕಾರ್ಮಿಕರ ಹೊಟ್ಟೆಯ ಮೇಲೆ ಹೊಡೆಯುವ ನಿರ್ಣಯ ಕೈಗೊಂಡಿದೆಯೆ? ಹೀಗೊಂದು ಪ್ರಶ್ನೆ ಹುಟ್ಟಲು ಕಾರಣ ಕೇಂದ್ರ ಸರ್ಕಾರದ ನಡೆಯೇ ಹೊರತು ಬೇರೇನಲ್ಲ. ಅಧಿಕಾರಕ್ಕೆ ಬಂದಾಗಿನಿಂದ ಕಾರ್ಮಿಕರ ಬದುಕಿನ ಜೊತೆ ಚೆಲ್ಲಾಟಕ್ಕಿಳಿದಂತೆ ವರ್ತಿಸುತ್ತಿರುವ ಮೋದಿ ಸರ್ಕಾರ ಅಸಲಿಗೆ ಮಾಡಲು ಹೊರಟಿರುವುದಾದರೂ ಏನು ಎಂಬುದು ಇದೀಗ ಮಿಲಿಯನ್ ಡಾಲರ್ ಪ್ರಶ್ನೆಯಾಗಿದೆ.

ದಿನನಿತ್ಯ ಏರುತ್ತಿರುವ ಸಾಮಗ್ರಿಗಳ, ಆಹಾರವಸ್ತುಗಳ ಬೆಲೆಗಳನ್ನು ಗಮನಿಸಿದರೆ ಕಾರ್ಮಿಕನೋರ್ವ ಪಡೆಯುತ್ತಿರುವ ವೇತನ ಯಾತಕ್ಕೂ ಸಾಲದು. ಇದನ್ನು ಪ್ರಮುಖವಾಗಿರಿಸಿಕೊಂಡು ಕಾರ್ಮಿಕ ಸಂಘಟನೆಗಳು ಈ ಹಿಂದೆ ಹಲವು ಬಾರಿ ವೇತನ ಪರಿಷ್ಕರಣೆ ಮಾಡುವಂತೆ ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದ್ದವು. ಆದರೆ ಇದನ್ನು ಕಿವಿಗೇ ಹಾಕಿಕೊಳ್ಳದ ಕೇಂದ್ರದ ವರ್ತನೆಯೇ ಸೆ.2ರಂದು ಕಾರ್ಮಿಕ ಸಂಘಟನೆಗಳು ದೇಶವ್ಯಾಪಿ ಬಂದ್‍ಗೆ ಕರೆ ಕೊಡುವಂತೆ ಮಾಡಿತು. ಯಾವಾಗ ಕಾರ್ಮಿಕರು ಒಟ್ಟಾಗಿ ಧ್ವನಿ ಏರಿಸಬೇಕೆಂದು ನಿರ್ಧರಿಸಿದರೋ, ತಕ್ಷಣ ಎಚ್ಚೆತ್ತುಕೊಂಡ ಮೋದಿ ಸರ್ಕಾರದ ಹಣಕಾಸು ಸಚಿವ ಅರುಣ್ ಜೇಟ್ಲಿ, “ಕೇಂದ್ರ ಸರ್ಕಾರದ ಕುಶಲಕರ್ಮಿಗಳಲ್ಲದ ಕೃಷಿಯೇತರ ಕಾರ್ಮಿಕರ ಕನಿಷ್ಠ ದಿನಗೂಲಿಯನ್ನು ರೂ.350ಕ್ಕೆ ಹೆಚ್ಚಿಸಲಾಗುವುದ” ಎಂದು ಹೇಳಿಕೆ ನೀಡಿದ್ದಾರೆ.

ದಿನಕ್ಕೆ ಕನಿಷ್ಠ ವೇತನ ರೂ.350 ಹೆಚ್ಚಾದರೆ, ತಿಂಗಳಿಗೆ 9,100 ರೂ. ದೊರೆತಂತಾಗುತ್ತದೆ. ಆದರೆ ಕಾರ್ಮಿಕ ಸಂಘಟನೆಗಳು ಅಧ್ಯಯನ ನಡೆಸಿ ತಮಗೆ ನೀಡಬೇಕೆಂದು ಈ ಹಿಂದೆ ಕೋರಿದ್ದ ವೇತನ ರೂ.15 ಸಾವಿರ. ಆದರೆ 7ನೇ ವೇತನ ಆಯೋಗದ ಶಿಫಾರಸುಗಳಿಗೆ ಕೇಂದ್ರ ಒಪ್ಪಿಗೆ ಸೂಚಿಸಿದ ಬಳಿಕ ಸಂಘಟನೆಗಳು ತಮ್ಮ ಬೇಡಿಕೆಯನ್ನು ತಿಂಗಳಿಗೆ ಕನಿಷ್ಠ ರೂ.18 ಸಾವಿರಕ್ಕೆ ಏರಿಸಿದ್ದವು. ಇದೀಗ ರೂ.350 ವೇತನ ಏರಿಸಿರುವ ಕೇಂದ್ರ ಸರ್ಕಾರ ಕಾರ್ಮಿಕರ ಕಣ್ಣೊರೆಸುವ ತಂತ್ರಕ್ಕೆ ಮುಂದಾಗಿದೆ, ಆದರೆ ಕಾರ್ಮಿಕ ಸಂಘಟನೆಗಳು ಇದಕ್ಕೆ ಸೊಪ್ಪು ಹಾಕಿಲ್ಲ.

ಆರ್‍ಎಸ್‍ಎಸ್‍ನ ಸಹ ಸಂಘಟನೆಯಾದ ಭಾರತೀಯ ಮಜ್ದೂರ್ ಸಂಘ, ತನ್ನವರನ್ನು ಬಿಟ್ಟುಕೊಡಲಾಗದೇ ಮುಷ್ಕರದಿಂದ ಹಿಂದೆ ಸರಿದಿದೆ ಎನ್ನುವುದೊಂದು ಬಿಟ್ಟರೆ ದೇಶಾದ್ಯಂತದ ಕಾರ್ಮಿಕ ಸಂಘಟನೆಗಳು ಸೆ.2ರಂದು ತಮ್ಮ ಬಲ ಪ್ರದರ್ಶನ ಮಾಡಿ, ಕೇಂದ್ರಕ್ಕೆ ಚುರುಕು ಮುಟ್ಟಿಸಲಿದ್ದಾರೆ. ಈ ಹಿಂದೆ ಕಾರ್ಮಿಕರ ಭವಿಷ್ಯ ನಿಧಿಯ ವಿಷಯದಲ್ಲಿ ಕೈಯ್ಯಾಡಿಸಲು ಹೋಗಿ ಕೇಂದ್ರ ಸರ್ಕಾರ ಮುಖಭಂಗ ಅನುಭವಿಸಿದ್ದು ಕಣ್ಣಮುಂದೇ ಇದೆ. ಇದೀಗ ಮತ್ತೊಮ್ಮೆ ಕಾರ್ಮಿಕರು ತಮ್ಮ ಅಸಮಾಧಾನವನ್ನು ಹೊರಹಾಕಲಿದ್ದಾರೆ. ಮೋದಿ ಈ ಕುರಿತು ಏನು ಕ್ರಮ ತೆಗೆದುಕೊಳ್ಳಲಿದ್ದಾರೆ ಎನ್ನುವುದು ಸದ್ಯದ ಕುತೂಹಲ.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s